బంధాలు - అనుబంధాలు

శీర్షిక: బంధాలు - అనుబంధాలు

సారం లేని మానులు
వట్టి పోయిన కొమ్మలు 
వాలి పోయిన ఆకులు 
వాసన పోయిన పువ్వులు 
వాడి పోయిన కాయలు 
ఏవీ పచ్చదనాలు?

కానరాని ప్రేమాప్యాయతలు
కనుమరుగవుతున్న అనురాగాలు 
కరుణా కటాక్షాలు
దూరమవుతున్న రాక పోకలు
మూఢ నమ్మకాలు అంటూ
కొట్టి పారేస్తున్న సంస్కృతి సాంప్రదాయాలు
బంధాలు రక్త సంబంధాలు ఎంత బలంగా ఉన్నా
ఏవీ అనుబంధాలు?

రక్త మాంసాలు ధారపోసి
దేహ కండరాలను కరిగించి 
కాలుకు ముల్లు గుచ్చితే పంటితో పీకి 
కంట్లో నలుసు పడితే నాలుకతో తీసి 
శ్రమించి చెమటోడ్చి పెంచి పెద్ద చేసి 
విద్యాబుద్దులు నేర్పించి ఉద్యోగాలు చేయించి 
శక్తి కొలది కట్న కానుకలిచ్చి పెండ్లిళ్ళు చేసి 
సాగనంపుతే 

వృద్ధ తల్లి దండ్రులు చుట్టు పక్కలనే నివశిస్తున్నా 
ఊరి పొలిమేరలోనే  జీవిస్తున్నా

మాటే బంగారమైనట్లు
తీపి జ్ఞాపకాలు చేదైనట్లు
కాగితపు పూల లాంటి మెస్సేజ్ లతో
పుట్టిన రోజు శుభాకాంక్షలు 
రక్షాబంధన్ శుభాకాంక్షలు 
వివాహ మహోత్సవ శుభాకాంక్షలు 
వాట్సాప్ లలో ఫేస్ బుక్ లలో 
ట్విట్టర్ లో పంపిస్తుంటారు

కన్న కొడుకులు బిడ్డలు కొందరికి
అవియునూ ఇష్టముండదు
మరి కొందరికి తీరికుండదు లేదా గుర్తుండదు 
ఇంకా లేదంటే మాతృమూర్తుల సేవలను 
డబ్బుతో వెల కడుతారు 

ప్రేమలు తరిగి పోయే

మమతలు కరిగి పోయే
మనసు కలవరపెడుతుండే
గడిచిన రోజు తిరిగి రాదు 
పోయిన కాలం మరల రాదు 
ఆపద వచ్చి నాలుగు రోజులు తింటే 
లెక్కలు కడుతారు
అలా ఎలా అంటే నరకం చూపిస్తారు 

అనారోగ్యానికి పదో పాతికో ఖర్చు చేస్తే 
లెక్కకు లెక్కే అంటారు ద్వేషాలు పెంచుకుంటారు 
పది మందికి విషయాలు పంచి పెడుతారు 

తలుచుకుంటే గుండెలో బాధ 
అయినా దాచుకోవాలి 
హృదయంలోనే వ్యధ
కడుపు చించుకుంటే కాళ్ళ మీద పడుతాయి 
రుధిరపు ధారలు!

తెలిసి వస్తుంది వారికీ
వారి బిడ్డలు వారికా కాగితపు  
బొకేలు అందించి నప్పుడు!

నేడు తల్లిదండ్రుల సేవలను 
డబ్బుతో  రూపాయలలో వెలకడితే 
రేపు వారి బిడ్డలు అదే డబ్బుతో
డాలర్లలో వెలకడుతారు, అంతే తేడా! 

*బంధాలు అనుబంధాలు రక్త సంబంధాలు
ఇక రైలు పట్టాలేనా?*