తెలంగాణా బతుకమ్మ పాటP

శీర్షిక: బతకమ్మ ఉయ్యాల పాట

బతకమ్మ బతకమ్మ ఉయ్యాలో - బంగారు బతకమ్మ ఉయ్యాలో "2"

రజాకార్లతో నాడు ఉయ్యాలో - రగిలి పోయే తెలంగాణా ఉయ్యాలో

తెలంగాణా ప్రజలను ఉయ్యాలో - తరిమి తరిమి కొట్టిరి ఉయ్యాలో

ఆడ పడుచులను ఉయ్యాలో - అవమాన పరిచిరి ఉయ్యాలో

చిన్న పిల్లలను ఉయ్యాలో - చితక బాదిరి ఉయ్యాలో

రాణి రుద్రమదేవి ఉయ్యాలో - ప్రతాప రుద్రుడు ఉయ్యాలో

సమ్మక్క సారక్కలు ఉయ్యాలో - చీల్చి చెండాడిరి ఉయ్యాలో

చాకలి ఐలమ్మ నాడే ఉయ్యాలో - చావ బాదే రజాకార్ల ఉయ్యాలో 

కొమురం భీమ్ ఉయ్యాలో - కొరివినే అంటించే ఉయ్యాలో

దాశరధి కృష్ణమా చార్య ఉయ్యాలో - కోటి రతనాల వీణ అనే ఉయ్యాలో

ప్రజా కవి కాలోజి ఉయ్యాలో - కవులకు ఊపిరి పోసే ఉయ్యాలో

కొండా బాపూజీ ఉయ్యాలో - బాంబులే వేసిరీ ఉయ్యాలో

కసాయి రాజాకార్లపై ఉయ్యాలో - కన్నెర్ర చేసే 'పటేలు' ఉయ్యాలో

'పటేలు' ఆక్షన్తో ఉయ్యాలో - తోక ముడిచే రజాకార్లు ఉయ్యాలో

ఆంద్రుల పాలనతో ఉయ్యాలో - తెలంగాణా అంధ కారమాయే ఉయ్యాలో 

అన్ని రంగాల్లోనూ ఉయ్యాలో - అభివృద్ధి కుంటు పడే ఉయ్యాలో

పది జిల్లాలలోను ఉయ్యాలో - ప్రజలు పస్తులే ఉండిరీ ఉయ్యాలో

కూడూ గుడ్డా కొరకు ఉయ్యాలో - ప్రజలు చెట్లల్లో దాగిరి ఉయ్యాలో

విద్యా ఆరోగ్యం కొరకు ఉయ్యాలో - విల విలా లాడిరి ఉయ్యాలో

చుట్టూ గోదావరే ఉన్నా ఉయ్యాలో - చెలుకలెండి పోయే ఉయ్యాలో

నదులెన్నో మన కున్నా ఉయ్యాలో - త్రాగు నీరే లేక పాయే ఉయ్యాలో

జయ శంకర్ ఊతంతో ఉయ్యాలో - జై తెలంగాణా నినాదాలతో ఉయ్యాలో

ప్రత్యేక రాష్ట్రం కొరకు ఉయ్యాలో - ఉద్యమాలే చేసిరి ఉయ్యాలో

తెలంగాణా విముక్తికి ఉయ్యాలో - దీక్షలే చేసిరి ఉయ్యాలో

ఆత్మ త్యాగాలతో రాష్ట్రం ఉయ్యాలో - దద్దరిల్లి పాయే ఉయ్యాలో

పదమూడేండ్లల్లో ఉయ్యాలో - పన్నెందొందల మంది ఉయ్యాలో

బలి దానాలు చేసిరి ఉయ్యాలో - పుత్ర శోకం పెట్టిరి ఉయ్యాలో 

ఎందరో ఉద్యమ కారులతో ఉయ్యాలో - ఎగిసి పడే తెలంగాణా ఉయ్యాలో

కళా కారుల పాటలతో ఉయ్యాలో - కలిసి వచ్చిరి జనులు ఉయ్యాలో

ముల్లోకాలు తిర్గి ఉయ్యాలో - ముచ్చెమటలు పుట్టించే ఉయ్యాలో

జూను రెండవ రోజు ఉయ్యాలో - రెండు వేల పదునాలుగున ఉయ్యాలో 

తెలంగాణా ఏర్పడే ఉయ్యాలో - సంబురాలు మిన్నంటే ఉయ్యాలో

బతుకమ్మ బోనాల ఉయ్యాలో - రాష్ట్ర పండుగలుగా చేసే ఉయ్యాలో

తెలుగు మహిళలందరికీ ఉయ్యాలో - స్వేఛ్చ వచ్చే నేడు ఉయ్యాలో 

అధికారులమనకుండా ఉయ్యాలో - ఊడిగం వారనకుండా ఉయ్యాలో

ఆడ వారందరం కలిసి ఉయ్యాలో - ఆహ్లాద కరంగా ఉయ్యాలో

ట్యాంక్ బండు కు చేరి ఉయ్యాలో - కోలాటం ఆటలతో ఉయ్యాలో 

బతకమ్మ పాటలతో ఉయ్యాలో - హోరు గొట్టించిరి ఉయ్యాలో

బతుకమ్మ పండుగను ఉయ్యాలో - ఘనంగా జరుపుతూ ఉయ్యాలో

బంగారు తెలంగాణాను ఉయ్యాలో - కలసి సాధిస్తిమి ఉయ్యాలో

(తెలంగాణ వచ్చిన తరువాత 2014 లో వ్రాసిన పాట, కొన్ని సవరణలతో)