ఓ మనిషిగా బ్రతుకడం అలవర్చుకో

శీర్శిక: ఓ మనిషిగా బ్రతుకడం అలవర్చుకో!

ఓ మనిషీ!

నేను  నేననే

నేనే ఘనమనే

అహము వీడు

ఒక మనిషిగా బ్రతుకడం అలవర్చుకో

సమాజంలో నీకంటూ ఒక గుర్తింపు తెచ్చుకో! 

సమరస భావమే నీకు నీడ

లేదంటే నీకు ఉంటుంది తేడ

విడిపోయావో అయ్యేవు మోడు

ఇకనైనా అహంకారం అహంభావం  వీడు

ఉంటారు సమస్త జనులు నీకు ఎప్పటికీ తోడు!

నాకే అంతా తెలుసుననీ

నేనే లేకపోతే ఏమీ జరుగదనీ

తోటి వారిని తొక్కేస్తాననీ

నిందించకు వ్యవస్థదే అంతా తప్పనీ

గుర్తుంచుకో నీవూ ఈ సమాజంలో ఒకడి వేననీ!

నీకన్న మిన్న జగతిలో ప్రకృతి

మార్చ బోకు దాని ఆకృతి

సకల జీవకోటికీ అది  సుకృతి

స్వార్ధభావముండిన చూపు వికృతి!

నాడు మనిషి చేసిన చిన్న తప్పిదం

కరోనా చేసే కరాళ నృత్యం

అల్ల కల్లోలమాయే ప్రపంచం

పేదా ధనికులని లేదు భేదం

చూప లేదు అది కులం మతం

కబలించే జనుల ప్రతి నిత్యం!

తండ్రిని కొడుకు చూడకుండా

కొడుకును తండ్రి చూడకుండా

శవాలను సహితం తాకకుండా

కన్నీరు ఘనీభవించే, రాల్చకుండా!

మట్టిలో పుట్టామని తెలుసు

మట్టిలో జీవిస్తామని తెలుసు

మట్టిలోనే గతిస్తామని తెలుసు

గిట్టిన ఏమీ తీసుకెళ్ళమని తెలుసు!

అయినా , 

ఓ మనిషీ నీకెందుకింత స్వార్ధం

నీకెందుకింత ఈర్ష్య అసూయ కుల్లు 

నీవు ఎదుగవు మరొకరినీ ఎదుగనివ్వవు

ఓ మనిషీ ... ఇక నైనా మేలుకో

ఓటమి నుండైనా గుణపాఠం నేర్చుకో!