ఓ మనిషీ / Oh Manishi

 *మేడే సందర్భంగా*

అంశం: ఓ మనిషి

ఓ మనిషీ!

ముసి ముసి నవ్వులతో

మురిసి పోతున్నావు

కూసమిడిచిన పాము వోలె

బుస కొడుతున్నావు

ఎందుకో ఈ ఎగిసి పాటు

ఎందుకో ఈ మిడిసి పాటు

అహంకారం అసూయ అహంభావం వద్దు 

ఎందుకంటే 

రాత్రంతా కష్టపడి విరిసిన పుష్పానికే

తెలియదు తెల్లవారితే దాని పయనం 

దేవుడి గుడికో లేక శ్మశానానికో 

నిరు పేదలపై , అమాయకులపై

ఎందుకంత ఏవగింపు అసహనం 

సాటి మనిషిని మేటిగా చూడలేవు 

నీవు

అమ్మ కడుపు నుండీ గాక ఆకాశం

నుండి ఊడి పడ్డావా?

చదువుల సరస్వతిని గణపతి వోలె 

పుక్కెట పట్టి పుట్టావా?

బంగారు గనిని ధన లక్ష్మి వోలె

బుజాన పెట్టుకుని వచ్చావా?

లేక సంజీవిని హనుమంతుడి వలే

ఒక్క చేతితో ఎత్తుకొచ్చావా?

లేక శ్రీకృష్ణుడి వలే

గోవర్ధన గిరిని చిటికెన వేలుతో ఎత్తావా?

ఏమిటి నీ సత్తా?

అంతా నాకే తెలుసనే అహంకారమెందుకు?

అందరూ నాకంటే తక్కువనే

అహంభావ మెందుకు?

ఒక్క సారి ఆత్మ విమర్శ చేసుకో

"నేనూ ఒక మనిషినేనని గుర్తు పెట్టుకో"

కుల మత ప్రాంత భేదాలు సృష్టించి

రాష్ట్రాలలో , దేశాలలో

అల జడులు యుద్దాలు సృష్టిస్తావు

బ్యాంకులను కొల్లగొట్టి విదేశాల్లో దాక్కుంటావు

నోట్లను ఎరవేసి ఓట్లు దండుకుంటావు

అవినీతి ఓట్లతో అధికారం చేపడుతావు

పేదలను దోచుకుని విదేశీ బ్యాంకుల్లో 

వ్యాపార సంస్థలలో పెట్టు బడులు పెడుతావు

అమాయకపు అబలలపై అఘాయిత్యాలు చేసి

ఏమీ ఎరుగ నట్లు నటిస్తావు

ప్రశ్నించే గొంతుకలపై ఉక్కు పాదం మోపుతావు

నమ్మిన నరులను మోసం చేసి కోట్లు పోగేస్తావు

ఈ శరీరం ఈ సంపద 

నీ భార్యా పిల్లలు బంధువులు, మిత్రులు

శాశ్వతమనుకుంటున్నావా? ఎప్పటికీ కారు 

నీ నడ్డిని విరిచే రోజు దగ్గరలోనే ఉంది

నీకు గుణపాఠం చెప్పే రోజు అతి చేరువలోనే ఉంది

నీ పాపాల చిట్టా నిండు కుంటున్నది

తస్మాత్ జాగ్రత్త!

నీకు పడే శిక్షలు

ఎక్కడో కాదు, 

మరెప్పుడో కాదు

నీవున్న లోకాననే

అవీ నీవు బ్రతికుండగానే!