వృద్ధాప్య దశ

అంశం: వృద్ధాప్య దశ 

శీర్షిక: *ఎండిన మ్రానులా*

*సముద్రాన్నైనా ఈదవచ్చు గానీ
సంసారాన్ని ఈదడం కష్టం* 

ఈ జీవన సాగరంలో
ఎన్నో ఆటుపోట్లు మరెన్నో ఇక్కట్లు
సముద్రంలోని సుడిగుండాల వలె
ఎన్నెన్నో అవమానాలు మరెన్నో అగచాట్లు! 

బాధలు సంతోషాలు సుఖాలు దుఃఖాలు 
కష్టాలు నష్టాలు ఆనందాలు అనుభవాలు 
అచ్చట్లు ముచ్చట్లు అందమైన తీపి గుర్తులు!

గెలుపులు ఓటమిలు నిందలు అపనిందలు 
దెబ్బలు ఎదురు దెబ్బలు
ఆరోగ్యాలు అనారోగ్యాలు  అన్నీ గుండెలోనే!

సంపద పోగు చేస్తే నిరుపయోగమని
పైసా పైసా కూడబెట్టి పిల్లలను చదివిస్తే
మనసుకు నచ్చిన వారిని మనువాడి
రెక్కలొచ్చిన పక్షుల్లా తెగిన గాలిపటాల్లా
దారిన వదిలేసి దూరం వెడలిపోయిరి!

అంతిమ దశలో అర్ధమాయే
పిల్లలకు కష్ట సుఖాలు తెలుపాలని
ఆర్ధిక వ్యవహారాలు వివరించాలని
చేతికి విచ్చలవిడిగా డబ్బు ఇవ్వకూడదని
పిల్లలను డబ్బు డాబుసరితో కాకుండా
మంచి మనసుతో ప్రేమతో ఉన్నతంగా పెంచాలని! 

చేతులు కాలాక ఆకులు పట్టుకున్నట్టు 
ఊరుకు దూరమవుతూ కాటికి దగ్గరవుతున్న వేళ
ఇప్పుడు విచారిస్తే ఏమి ప్రయోజనం
గడిచిన కాలం తరిగిన వయసు తిరిగి రాదు
సాధించాలని కోరిక  చేయాలని మనసున్నా
వయసుడిగిన శరీరం సహకరించదు!

జీవిత కాలం తోడుంటానని బాస చేసిన
భాగస్వామి  స్వార్డంతో  వెడలి పోగా
*ఎండిన మ్రాను* వోలే మొండి బ్రతుకాయే
ఎవరి కోసం బ్రతకాలి? ఎందుకోసం బ్రతకాలి?
ఎక్కడికి వెళ్ళాలి? ఈ చేతి కర్ర సాయంతో
ఇంకెంత కాలం ఈదాలి? ఈ జీవన సాగరంలో
ఆ పడమటి సంధ్యాతీరం కోసం వేచి చూస్తూ..!