మనసు పొరలు విచ్చుకుంటే

*నేటి అంశం*హృదయం ఏమంటుంది*

శీర్షిక: *మనసు పొరలు విచ్చుకుంటే*

మల్లెపువ్వు రెమ్మలు విచ్చుకుంటే
సుగంధ పరిమళాలు వెదజల్లి నట్లు
పక్షులు రెక్కలు విచ్చుకుంటే
ఆకాశంలో స్వేచ్ఛగా ఎగిరి నట్లు
*మనిషి మనసు పొరలు విచ్చుకుంటే*
నవనవోన్మేషంగా ఆలోచిస్తారు 
మానవ భూలోకంలో అజరామరంగా
విరాజిల్లుతారు!

లోకంలో గొప్ప పేరు
కీర్తి ప్రతిష్టలు సంపాదించాలంటే
మనిషికి ఉండాల్సింది శరీర ఆకృతి కాదు
మంచి మనసు నీతి నిజాయితీ వ్యక్తిత్వం            నమ్మకం క్రమశిక్షణ ప్రేమ జాలి దయ కరుణ                సేవా దాన గుణాలు ధర్మ గుణాలు              అనురాగాలు ఆప్యాయతలు                               నిస్వార్థ ఆలోచనలు ఆధ్యాత్మిక చింతనలు!

మానవుడు విశాల హృదయంతో
ఉన్నపుడే ఇవి సాధ్యమగును 
వారి ముఖం లోనే కనబడును
ఆ తేజస్సు ఆ యశస్సు ఆ వర్చస్సు!

మనసు పొరలు విచ్చుకోనటువంటి
సంకుచిత హృదయస్తులు కఠినంగాను
బండ రాయి గానూ కోపంగానూ
చిరాకుగా ఉండి ఎవరి మనసునూ
దోచుకో లేరు ఎవరినీ ఆకట్టుకోలేరు
అలాంటి వారు ప్రశాంతంగా జీవించలేరు
ఎదుటి వారిని ప్రశాంతంగా జీవించనివ్వరు!

మానవ జీవితం చాలా చిన్నది
బ్రతికిన కొంత కాలమైనా
ముఖంపై చిరు నవ్వుతో
నలుగురితో కలిసి మెలిసి జీవించాలి
ప్రశాంత వదనంతో గడుపాలి
చేతనైన సహాయం చేస్తూ  ఆదర్శంగా నిలుస్తూ
రేపటి తరాలకు  అశాశ్వతమైన వెంటరాని
సంపదలను కాకుండా సంస్కారాన్ని 
భారతీయ సంస్కృతిని సాంప్రదాయాలను 
తాను చేసిన మంచి కర్మలను వ్యక్తిత్వాన్ని 
భావి తరాలకు వారసత్వంగా అందించాలి
అదే నిజమయిన జీవితం 
అతడే నిజమైన మనీషి!