వీది వర్తకులు

*నేటి అంశం -చిత్ర కవిత*

శీర్షిక: *వీది వర్తకులు*

*కూటి కోసం కోటి విద్యలు* అన్నట్లు
"పొట్ట కూటి కోసం పుట్టెడు మార్గాలు"

ఉన్న చోట
బ్రతుకు దెరువు లేక
తిండి లేనిదే బ్రతక లేక
రెక్కాడితే గానీ డొక్కాడని బ్రతుకులు
అమ్మా నాన్నల కడుపు నింప
భార్యా బిడ్డల ఆర్తి దీర్చ
సద్దీమూట ‌సర్ధుకుని
పొట్ట చేత పట్టుకుని
ప్రక్క గ్రామాల నుండో
ప్రక్క జిల్లాల నుండో
పొరుగు రాష్ట్రాల నుండో!

నెత్తిపై మూటలు
కాళ్ళ క్రింద మంటలు
భార్యా పిల్లలతో తంటాలు
బస్సులు రైళ్లు దాటి
మండు టెండలలో
ఎండిన కడుపులతో
బ్రతుకు దెరువున్న చోటికి
జీవనోపాధి కొరకు
వెతుకు తుంటారు!

గ్రామ శివార్లలో
పట్టణ రహదార్లలో
గుడారాలు కట్టుకుని
డేరాలు వేసుకుని
జీవనం సాగిస్తారు
అదే వారి నివాసం
అదే వారి ప్యాలేస్!

రంగురంగుల బుగ్గలు
బూరుమిఠాయీలు
పింగాణీ వస్తువులు
గాజు వస్తువులు
అద్దాలు శిక పిన్నులు
ప్లాస్టిక్ వస్తువులు
పిల్లల ఆట వస్తువులు
అమ్మడంలో అలసట ఎరుగరు!

ఎండనక వాననక
చలి అనక పడిశం అనక
రేయనక పగలనక
చిన్న పెద్దా తేడాలనక
స్త్రీలనక పురుషులనక
పిల్లలనక ముదుసలినక
సమైక్యంగా అందరూ శ్రమిస్తారు
కష్టాన్ని నమ్ముకుని!

ఏ పగలో ఏ సాయంత్రంమో
మామూళ్ళకు వచ్చి చెదరగొట్టే
పోలీసులను చూసి
క్షణ క్షణం భయంభయంగా
కక్కలేక మ్రింగలేక అన్నట్లు
కాలం గడుపుతారు!

కష్టాలు వచ్చినా
నష్టాలు వచ్చినా భరిస్తూ
వచ్చిన దాంతోనే తృప్తి పడుతూ
ఒక చోట నుండి మరోచోటికి
పలస జీవులు
డేరాలను విప్పుకుంటూ
దేహాలపై కప్పుకుంటూ
పంచభూతాలను నమ్ముకుని
జీవన ప్రయాణం సాగిస్తారు!

*కలిసి ఉంటే కలదు సుఖమనీ*
*బ్రతకడానికి ఈ ప్రపంచం ఎంతో విశాలమనీ*
*మనసుంటే జీవన మార్గముంటుందనీ*
*శ్రమ మన ఆయుధమైతే విజయం*
*బానిస అవుతుందనీ*
*ఆత్మాభిమానంతో బ్రతకడంలో తృప్తి లభిస్తుదని*
సమాజానికి గొప్ప సందేశాన్నిస్తూ
బ్రతుకు బండి సాగిస్తారు *వీది వర్తకులు*!