తీగతెగిన హృదయవీణ

అంశం:- తీగ తెగిన హృదయవీణ

శీర్షిక:- *మోడు బారిన వృక్షంలా*

*నిండు పున్నమి రోజున చందమామ వెదజల్లే కాంతులవలే నీ మనసు...*

*గులాబితోటలో పరిమళాలతో గుభాలించే పువ్వులవలె నీ సొగసు...*

*గలగలా పారే నిండు గోదావరిలా వినిపించే నీ నవ్వులే నవ్వులు...*

*నీ అందానికి సౌందర్యానికి ప్రకృతి పులకరించి పోయేది సిగ్గుతో...*

*తాండవం చేసేవి ఝరులు గిరులు తరువులు జీవకోటి పులకరింతలతో...*

*కమలపద్మం లాంటి అందమైన నీ కనులు హంసరెక్కలు వంటి నీ కనురెప్పలు...*

*నిశీధిలో ఆకాశంలో నీలిమేఘాల్లాంటి నల్లని నీ కురులు...*

*చాంతాడంత నాగసర్పపు నీ వాలుజడ, నిండుగా గుభాలించే మల్లెల దండ..*

*చంద్రబింబం లాంటి సుందరమైన నీ మోము అనురాగ ఆహ్వానం పలుకుతుంటే...*

*గలగల పారే సెలయేరు ప్రక్కనే సైకత శిల్పాలు కొలువుదీరగా..*

*లేలేత పచ్చిక బయళ్ళపై కూర్చుని, గడ్డి సువాసనను ఆస్వాదిస్తూ...*

*ఆనందిస్తిమి భారత సరిహద్దులో  మానస సరోవరం అందాలను చూస్తూ..*

*ఆహా! సుందర దరహాసం నీ తడిచిన చీరలో పసిడి కాంతులతో మేను...*

*నీ శుభకర కరములు నా మేనుకు తగలగ తన్మయం చెందితి...*

*హృదయానంద నందముతో నా మదిలో మురిసిపోతిని పరవసించిపోతిని...*

*ఏమి ఏమీ నాటి మధురాతి మధురమైన అనుభూతులు...*

*కాలం కళ్ళెం వేయలేకపోయేది మన ఆనందాలకు సంతోషాలకు...*

*నాటి తీపితీపి జ్ఞాపకాలు సుస్థిరంగా హృదిలో నిలిచిపోయే...*

*కనికరం లేకుండా కానరాని లోకాలకు నీవు తరలిపోతే...* 

*నేనుండిపోతి తీగతెగిన హృదయవీణలా మోడుబారిన వృక్షంలా, చెదిరిన గుండెతో...*