Tuesday, July 1, 2025

సాఫ్ట్వేర్ ఉద్యోగాలు -2

అంశం: స్వేచ్చా కవిత

శీర్షిక: *సాఫ్ట్వేర్ ఉద్యోగాలు*

కాలం మారుతుంది తరం మారుతుంది
జనం మారాలి కాలంతో మనం మారాలి
సోషల్ గా ఉండాలి సోషల్ గా తిరుగాలి
పేర్లు పెట్టే పిలువాలి గౌరవాలు మానేయాలి
వీకెండులు వాకెండులతో ప్రోగ్రాములు
అర్ధరాత్రులూ ఉద్యోగాలు అధిక ప్యాకెజీలు
ఇవే సాఫ్ట్వేర్ ఉద్యోగాల నియమాలు!

ఆవులించను దొరుకదు సమయం
భార్యా పిల్లలతో ప్రేమానురాగాలు మృగ్యం
అమ్మా నాన్నలతో ఆప్యాయతలు శూన్యం
ఎందుకో నాలుగు గోడల మధ్య అరణ్య వాసం!

మా బాబుకు డాలర్లలో వేతనం
విదేశాలలో ఉంటాడంటూ తల్లిదండ్రులు
అమ్మాయిని చూడటానికి రమ్మంటే
అమ్మా నాన్నే చూస్తే చాలంటూ సాఫ్ట్వేర్లు!


సాఫ్ట్వేర్ ఉద్యోగాలనీ అధిక ప్యాకేజీలనీ
నీడపట్టున ఉంటారని పెళ్లిళ్లు చేస్తే
అమ్మాయి నచ్చట్లేదనీ అబ్బాయిల తీరు
యేడాది తిరుగక ముందే విడాకులు
లక్షలు కోట్ల రూపాయలకు కేసులు పెట్టి
బ్లాక్ మెయిల్ చేసే అమ్మాయిలు ఎందరో!


ఇరు కుటుంబాల మానసిక వ్యధలు 
పరువు పరువు ప్రతిష్టలు వర్ణనాతీతం 
ఆ తరువాత పెళ్ళిళ్ళకు సంకటం 
ఆస్తులు సంపదలు కర్పూర హారతి!

రోజుకు పదహారుగంటల రేడియేషన్ తో
కలల పంటను పండించుకోలేకుండా 
సంతాన లేమితో  బాధపడుతూ
నరకమనుభవిస్తున్న జీవితాలు మరెన్నో!

భార్యా భర్తలను పిల్లలను విడదీసే
ప్రాజెక్ట్ వర్కులతో బందీలను చేసే
గట్టిగా తుమ్ముతే ఊడే సాఫ్ట్వేర్ ఉద్యోగాలు
ఇక ఇఎమ్ఐ లు కట్టలేక నానా ఇబ్బందులు
రోజుకు పదహారు గంటల పని దినాలతో
కృంగి కృశించి పోతున్నారు సాఫ్ట్వేర్ ఉద్యోగులు!

జీవితమంటే డబ్బు సంపాదించడమేనా?
కాదు కుటుంబం బంధాలు అనుబంధాలు
ప్రేమాప్యాయతలు ఆరోగ్యం ఆహ్లాదం
ఆనందాలు సంతోషాలు సహితం ముఖ్యమే
సాఫ్ట్వేర్ ఇంజనీర్లకు పని గంటలు తగ్గించాలి
వారికి ఉద్యోగ భద్రతలను కల్పించాలి
రేడియేషన్ తగ్గించే టెక్నాలజీ ప్రవేశపెట్టాలి!
 

No comments: