తృప్తి ఆనందం సంతోషం

శీర్శిక: *తృప్తి ఆనందం సంతోషం*

తన కొరకా? పరుల కొరకా?
స్వార్ధమా? నిస్వార్థమా?
తనకు మాలిన ధర్మం చేయాలా వద్దా?
నిజంగానే పరుల కొరకే చేసుకుంటూ పోతే
చివరకు తనకు మిగిలేది ఏమిటి?
ఇలాంటి ప్రశ్నలు కొందరిలో తొలుచక మానవు!

శిశువు జన్మిస్తూనే
తన తల్లి తండ్రులకు డాక్టర్లకు
మొక్క మొలకెత్తుతూనే
తన యజమానులకు తోట మాలీలకు
వాటికి తెలియకుండానే సంతోషాన్ని
ఆనందాన్ని ఆహ్లాదాన్ని కలిగిస్తాయి!

శిశువైతే తల్లిదండ్రులకు
మొక్కైతే యజమానులకు
మేము సృష్టి కర్తలం అనే భావనతో
తృప్తిని  సంతోషాన్ని కలిగిస్తే
డాక్టర్లకు ఆయాలకు తోటమాలీలకు
ఇప్పటి వరకు వారు పడిన శ్రమకు
ఫలితం దక్కిందన్న ఆనందం కలుగుతుంది!

తృప్తి ఆనందం సంతోషం అనేవి
అమూల్యమైనవి అవి వెలకట్టలేనివి
వేటితోనూ  తూచలేనివి కొలువ లేనివి
అంగట్లో కొందామన్నా ఎక్కడా దొరుకనివి!

అలానే మనిషిగా ఎదిగాక కూడాను
తాను చేసే ప్రతి పనిలో  ప్రతి సేవలో
నీతి నిజాయితీ స్వచ్చత ఉండాలి
అది నిస్వార్థంతో కూడినదై ఉండాలి
సమాజ శ్రేయస్సుకై ప్రజా హితమై ఉండాలి!

అప్పుడే మనిషి పై నమ్మకం ఏర్పడుతుంది
ఎనలేని గుర్తింపు గొప్ప గౌరవం దక్కుతుంది
కీర్తి ప్రతిష్టలు పెరుగుతాయి
చరిత్ర పుటల్లో వారికో పేజీని ఏర్పరుచుకొని
స్థిర స్థాయిగా నిలిచిపోతారు