అరుదైన ఆరుద్ర ప్రాణులు

అంశం: చిత్ర కవిత (ఆరుద్ర పురుగులు)

శీర్షిక: *అరుదైన ఆరుద్ర ప్రాణులు*

తొలకరి వానలకు పుడమి తల్లి
పులకరించ కమ్మని మట్టి వాసనలతో
తన్మయత్వంతో ఎక్కడో అవనిలో
దాగివున్న ఆరుద్ర ప్రాణులు
ఎర్రని సుతి మెత్తని మఖమల్
లాంటి పట్టు వస్త్రాలు ధరించి!

తడి దారులలో గుంపులు గుంపులుగా
అత్తారింటికి దారేది అన్నట్లుగా
ప్రయాణం సాగిస్తుంటే
ఆహా! ఆ ఆనందం వాటి అంద చందాలు
ప్రత్యక్షంగా కనులతో వీక్షించాలే గానీ
వర్ణించడం ఎవరి తరం కాదు!

బ్రహ్మ సృష్టించిన అపురూప జీవులను 
దోసిలిలో పట్టుకుని ఆడుతుంటే
వాటి సుతిమెత్తని కాళ్ళతో నడుస్తుంటే
ఆ ఆనందం వర్ణనాతీతం
అనభవిస్తేనే తప్పా చెప్పడం వీలు కాదు!

ఆరుద్ర జీవులకు సంతానోత్పత్తి ఎక్కువ
ఆయుష్షు చాలా తక్కువ
అతి తక్కువ కాలంలోనే రైతన్నలకు
గొప్ప సందేశాన్ని అందిస్తాయి
"ఆరుద్ర కార్తె" లో ఆరుద్ర ప్రాణులు
కనపడ్డాయంటేనే
పూర్వ కాలంలో నిరక్షరాస్య రైతులు
వ్యవసాయ పనులు మొదలు పెట్టడం
ఒక ఆనవాయితీ!