పెరుగుట విరుగుట కొరకే

అంశం: *ఆర్టిఫిషియల్ ఇంటిలీజెన్స్*

శీర్షిక: *పెరుగుట విరుగుట కొరకే*

*సముద్ర కెరటం గగనమెత్తు ఎగిరినా*
*తిరిగి సముద్రంలో పడక మానదు*

*పెరుగుట విరుగుట కొరకే అన్నట్లు*

*టెక్నాలజీ ఎంత పెరిగినా*
*అది జనహితం కానిచో హిమమయమే!*

గ్లోబలైజేషన్, లిబరలైజేషన్
ప్రయివేటైజేషన్ కు అంకురార్పణ జరిగాక
ప్రపంచం ఒక కుగ్రామంగా మారింది
టెక్నాలజీ  అంచెలంచెలుగా విస్తరించి
కంప్యూటర్లు , చరవాణీలు రావడంతో
అరచేతిలోనే స్వర్గంలా ఒంటి వ్రేలుతో
చకచకా పనులు కదం తొక్కుతున్నాయి!

సంస్కారం నేర్పని చదువు ఎందుకు?
భారతీయ సంస్కృతి సంప్రదాయాలను
విస్మరించి జన్మనిచ్చిన తల్లిదండ్రులను
పోషించలేని సేవలు కర్మలు చేయలేని
విద్య అవసరమా? అనిపిస్తుంది ఒక్కోసారి!

నేడు పదిమంది శ్రామికులు చేసేపని
ఒక మెషీన్ పూర్తి చేస్తుండే
కార్మిక చట్టాలను తుంగలో తొక్కిరి
నిరుద్యోగ సమస్య పెరిగి పోతుండే
పనేది లేక ఉచిత డబ్బు కొరకు
ఆన్లైన్ మోసాలకు పునాది వేసిరి
అకౌంట్లలో డబ్బ ఖాలీ అవుతుండే!

ఇక ఇప్పుడు *ఆర్టిఫీషియల్ ఇంటిలీజెన్స్*
"కృత్రిమ మేధస్సు" మరమనుషుల రాకతో
ఉద్యోగులపై ముప్పేట దాడి
డబ్బుతో అహంకారం పెరిగి పోయే
చరవాణీలతో  జ్ఞాపకశక్తి అనారోగ్యం
విలువైన సమయం దెబ్బతినే
మానవ సంబంధాలు దూరమాయే
సహజీవనం వెసులుబాటుతో
వైవాహిక సంబంధాలు అయోమయం
పెళ్ళిళ్ళకు ఆసక్తి క్రమంగా తగ్గుముఖం!

ఇలాగే "కృత్రిమ మేధస్సు" వంటి
సాంకేతిక పరిజ్ఞానం పెరిగి పోతే
రేపు మర మనుషులు విస్తరిస్తే
మనుషులు చేసే పనులన్నీ రోబోలే చేస్తే
మానవుల రాస క్రీడలు రోబోలే తీరుస్తే
ఇక బంధాలు అనుబంధాలు ఉష్ కాకే
జనులలో ప్రేమ దయ జాలి మృగ్యమే
వ్యాపార బంధాలకే పెద్ద పీట!

రోబోల కారణంగా కొన్ని వర్గాలలో
జనాభా తగ్గుముఖం పడితే
రాజీ పడని మరికొన్ని వర్గాలలో జనాభా
మెల్లమెల్లగా చాపకింద నీరులా విస్తరించి
ఆదిపత్య పోరుతో  ఒకరినొకరు
కొట్టుకోవడం చంపుకోవడంతో పాటు
మూడవ ప్రపంచ యుద్దానికి కూడా
దారితీయ వచ్చు!

"ఆర్టిఫీషియల్ ఇంటిలీజెన్స్" రెండువైపులా
పదునైన కత్తి వంటిది
ఎలాంటి సమస్యకైనా సమాధానం
ఏ పనినైనా చేసి పెడుతుంది
మనిషికి మనిషికి అవసరం లేకుండా చేస్తుంది!

పెరుగుతున్న సాంకేతిక విజ్ఞానం
పిచ్చోడి చేతిలో రాయిలా కాకూడదు
పాశ్చాత్య సంస్కృతిలో కొట్టుకు పోకూడదు
భారతీయ సంస్కృతి సాంప్రదాయాలకు
ముప్పు వాటిల్లకుండా ఉండాలి!