నా ఊహా

అంశం: నా ఊహా

శీర్షిక: చంద్ర మండలం విహార యాత్ర
(ప్యాకేజీ పది వేల కోట్లు)

అందమైన అంతరిక్షంలో
బహు సుందరంగా ముస్తాబైన వ్యోమనౌకలో
నేను నా శ్రీమతితో కలిసి
విశ్వావసు సంవత్సరంలో మూడు మాసాలు
విహార యాత్రకు బయలు దేరాలని

భూగోళ మంతా ఉల్లాసంగా చుట్టి రావాలని
వీలయితే చంద్రమండలం వెళ్లి
చంద్రుడితో కొన్ని విషయాలు మాట్లాడాలని
పుడమి పైన జనులు నీ పిలుపు కోసం
తహతహ లాడుతున్నారనీ
వారు రావడానికి అనుకూల వాతావరణాన్ని
కల్పించమనీ చల్లని వెన్నెలను కురిపించమనీ

నాయకులు బ్యూరో క్రాట్లు బడా వ్యాపారులు
సొమ్ములు దాచ లేక ఇక్కట్ల పాలవుతున్నారని
నీ దగ్గర దాచి పెడుదామని చూస్తున్నారనీ
అవకాశం కల్పిస్తే నీ జాగను ఎంత ధరచెప్పినా
కొనడానికి సిద్ధంగా ఉన్నారనీ

చంద్ర మండలం రాక పోయినా
మనోహరమైన నిన్ను చూడక పోయినా
భూమిమీద ఉండే నీ భూమిని కొంటున్నారు అమ్ముతున్నారని మాత్రం చెప్పను
ఎందుకంటే నేనూ భారతీయున్నే కదా
మెడలు పట్టి క్రిందకు తోసేస్తడు
ప్రక్కనే మా శ్రీమతి ఉంది అసలే సతీ సావిత్రి!

అలా అక్కడ ఒక నెలంతా గడిపి
గురువు వద్దకు వెళ్ళి నమస్కరిస్తాను
అక్కడ మనుషులు నివసించడానికి
వీలుగా ఉందా లేదా అని
గురు గ్రహమంతా నెల రోజులు తిరుగుతాం
గురువుతో మాట్లాడి సెలవు తీసుకుంటాను

ఆటు పిమ్మట వెలుగుల జిలుగుల
శుక్రగ్రహం తిన్నగా వెలుతాం
అక్కడ ఓ పదిరోజులు గడుపుతాం
జనులు నివసించ యోగ్యంగా ఉందా లేదా అని
ఫోటోలు ఎప్పటికప్పుడు సాటిలైట్ ద్వారా
పంపించే ఏర్పాట్లు చేశాను

తిరిగి వచ్చేటప్పుడు భూమి చూట్టూ తిరుగుతూ
చక్కర్లు కొడుతూ షికార్లు చేస్తూ
ఆ ప్రక్కనే ఉన్న స్వర్గాన్ని దర్శించి
మా ఆలికి ఇష్టమైన దేవతా కమలాలను కోసుకుని
నేరుగా సముద్ర తీరాన దిగుతాం