ఆకాశ వీధిలో

అంశం: ఆకాశ వీధిలో

శీర్షిక: *గగన శిఖామణులతో ప్రయాణం*

ఆకాశ వీధిలో హరివిల్లు 

ఇంద్ర ధనుస్సులో సప్తవర్ణాలు

అవి మానవులకు అందని ద్రాక్ష పండ్లు

*విమానయానం అంటే గగన కుసుమం నాడు*
*బస్సు ప్రయాణం కంటే సులభం నేడు*
*నాడు భోగం నేడు అవసరం*

ఆహా! సుందరం ఆ విమానాశ్రయం
రైళ్ళు పరుగెడుతున్నట్లు భయం భయం
లోపలికి వెళుతుంటే అంతా అయోమయం
చూస్తుంటే కలుగుతుంది ఎంతో సంబురం!

విమానంలోనికి అడుగు పెట్టగానే
విరబూసిన ముద్ద మందారం లాంటి
చిరు నవ్వుతో
సుగంధ పరిమళాల సువాసనలతో
ఆహ్లాదపరిచే ఆహార్యంతో
స్వాగతం పలుకుతారు *గగన శిఖామణులు*
సూచనలు చేస్తారు భద్రతలు చెబుతారు
పాయిలెట్ల  అనుభవాలు వివరిస్తారు
ధైర్యాన్ని ఇస్తారు ఉల్లాస పరుస్తారు!

విమానం టేకాఫ్ తీసుకుని
రయ్ మంటూ గరుడ పక్షిలా
గగన వీధుల్లోకి ఎగురుతుంటే
ఆ ఆనందం వర్ణనాతీతం
అనుభవిస్తేనే ఎవరికైనా తెలుస్తుంది!

అద్దాల నుండి బయటకు చూస్తుంటే
పుడమి అంతా నిర్మానుష్యంగానూ
మబ్బులు నురుగులు కక్కుతున్నట్లు
పరుగులు తీస్తున్నట్లు బహు సుందరం
రాత్రి వేళల్లో వెలుగుల జిలుగులు అద్భుతం!

మబ్బులలో ఒక్కో అడుగు పైకి లేస్తుంటే
ఒక్కో అడుగు క్రిందికి దిగుతుంటే
మట్టి రోడ్లపైన "పల్లె బస్సు" నడుస్తుస్నట్లుగా
లొడలొడ బడబడ శబ్ధాలు వణుకు పుట్టిస్తాయి
మెల్లమెల్లగా మేఘాలను దాటిందంటే
ఇక అది పుష్పక విమానమే!

గగన వీధుల్లో విమాన ప్రయాణం
ఎంతో ఆనందాన్ని అనుభూతిని కలిగిస్తుంది
విమాన టిక్కెట్ ధర కాస్త ఎక్కువే అయినా
తక్కువ సమయంలో గమ్యం చేరుతాం
కనువిందు చేసే దృశ్యాలను ఆస్వాదిస్తాం!